Faint o gwsg sy’n normal?

Byddwch yn aml yn gweld neu’n clywed bod “angen 7 neu 8 awr o gwsg y noson” i gadw’n iach yn gorfforol ac yn feddyliol. Er bod angen tua 7-9 awr o gwsg y noson ar oedolion dan 65 oed, mae ein hunion anghenion cwsg yn unigol iawn. Bydd rhai pobl yn gweithredu’n dda iawn ar ôl 5 neu 6 awr o gwsg, tra bod eraill yn cael trafferth gyda llai nag 8 neu 9 awr. Mae ein hanghenion cwsg hefyd yn newid wrth i ni symud trwy fywyd – rydym yn tueddu i fod angen mwy o gwsg yn ystod plentyndod, cyfnod y glasoed a beichiogrwydd a llai o gwsg wrth i ni fynd yn hŷn. Ond nid yw hyn yn wir i bawb. Gall trawsnewidiadau mawr mewn bywyd fel dod yn rhiant, mynd trwy’r menopos, neu wrth fynd trwy straen neu newidiadau mawr mewn bywyd effeithio ar ein cwsg. Meddyliwch am symud tŷ, priodi, cael dyrchafiad yn y gwaith, salwch yn y teulu ac ati. Y peth pwysig yw deall sut rydych chi’n teimlo – ydych chi’n deffro’n teimlo’n barod ar gyfer y diwrnod? Neu a ydych chi eisiau aros o dan y dwfe, a’ch pen yn teimlo’n drwchus ac yn drwm a’ch llygaid yn goch? Os mai’r olaf sy’n wir, rhowch gynnig ar rai o’m hawgrymiadau isod.

Sut alla i wneud yn siŵr fy mod i’n cael digon o ‘gwsg da’?

Diolch byth mae digon o bethau y gallwch eu gwneud i gefnogi eich corff i gael noson dda o gwsg:

• Cael amserlen gwsg gyson a chadw ati gymaint â phosib, hyd yn oed ar benwythnosau neu ddiwrnodau i ffwrdd o’r gwaith!
• Canolbwyntio ar hydradu da yn ystod y dydd a lleihau faint o hylif rydych yn ei yfed yn ystod yr awr cyn i chi fynd i’r gwely, er mwyn osgoi gorfod codi i fynd i’r toiled yn ystod y nos
• Mae treulio amser yn yr awyr agored bob dydd yn cefnogi’r gwahanol hormonau sy’n cyfrannu at gwsg
• Gwneud ymarfer corff rheolaidd – ond nid yn ystod yr awr neu ddwy cyn i chi fynd i’r gwely
• Osgoi cyfnerthwyr fel caffein, alcohol a thybaco neu gael pryd o fwyd trwm gyda’r nos
• Creu ystafell wely gysurus a chyfforddus i’ch helpu i ymlacio cyn mynd i gysgu
• Creu arferion ymlacio tawelol i atgoffa eich corff ei bod hi’n amser gwely – myfyrio, darllen neu weithgareddau tawelol eraill
• Gwrando ar fyfyrdodau, ‘sleepcast’ neu synau ymlaciol eraill wrth i chi syrthio i gysgu
• Cofnodi eich pryderon a’ch gofidiau ar bapur cyn i chi fynd i’r gwely – mae hyn wir yn helpu os ydynt ar eich meddwl pan fyddwch yn ceisio mynd i gysgu
• Creu cysylltiad cryf rhwng y gwely a chysgu – cadw gwaith, gliniaduron, y cyfryngau cymdeithasol i ffwrdd o’ch ystafell wely. Dwi’n gwybod bod yna demtasiwn i wylio fideos o anifeiliaid ciwt neu sgrolio trwy’r cyfryngau cymdeithasol cyn mynd i’r gwely, ond gall hynny darfu ar y cysylltiad yn ein hymennydd a’i gwneud hi’n anoddach i gysgu yn y tymor hwy.

 Cofiwch, mae pob un ohonom yn cael adegau pan fydd cwsg yn anoddach, yn enwedig pan fydd bywyd yn mynd yn brysur, neu pan fyddwn yn mynd trwy newidiadau mawr mewn bywyd. I lawer, bydd yr awgrymiadau hyn yn helpu, ond os ydych chi’n teimlo ei fod yn dod yn fwy o broblem, neu os yw’n effeithio ar sut rydych chi’n teimlo neu’ch gallu i ymdopi drannoeth yna mae angen i chi gysylltu â’ch meddyg teulu neu weithiwr iechyd proffesiynol arall a chael rhywfaint o gymorth.